Startseite   |   Anregungen   |   Login   |   Impressum   |   Datenschutz
Link zur Seite versenden   Druckansicht öffnen
 
Brief ans Chrischtkind

 

Liewes Chrischtkind!

Ich sitz do un schreib an Dich.

Drauß is alles still.

Sei so gut un denk an mich,

weil ich manches will.

Ich hätt´ gern, wann´s geht, e Bopp,

zum Spaziere nemme,

eeni mit ´me lange Zopp,

wu ich als kann kämme.

Bring mer aach e Boppescheeß

un en Spielzeiglade

un e Bütt in dere Greeß,

for die Bopp zu bade.

Unser Karlche will en Gaul

un en Lädderwache.

Zinnsoldate will de Paul

un noch woll´ne Sache.

´s Schweschterche, die klee Kathrin,

die will bloß en Ranze,

Klicker un e Dampmaschin

un so Schuh zum Danze.

Bring e scheenes Märchebuch,

ebbes vum Schneewittche,

dono is schun lang die Such,

des is for´s Brigittche

Un de Mamme bring e Klääd

un drei diefe Däller

un en Hut, do bot se Frääd,

awwer keen so´n heller.

Gutsel hämmer selbscht geback,

sticker siwwe Sorte,

Niss sin do un aach en Sack

Hutzle, ganz verschnorrte.

Un em Babbe, na dem schenkscht

Zigarre, e Päärche,

un e Briefdasch, wann d´ dra denkscht

So, des wär´s.

Dei Klärche

                                   Otto Wilms